Kurdistanî, ji ber gara Strasburgê heta meydana stadyuma Meynoyê meşiyan.

Li ber korteja meşê, qasî hezar ciwanî kincên reş lixwekirin û xwe bi zincîran girêdan.

Piştî ciwanan, jinan posterên Ocalan, alên KONGRA GEL, pankart û dowîzên komployê şermezar dikin hildabûn, di refên meşê de cîh girtin.

Bi deh hezaran Kurd, saet di 12.30an de bi marşa Ey Raqib a Hunermendên Akademiya çandê ya Kurd gotin, ketin meydana mîtîngê.

Axaftina vekirinê ya mîtîngê jî, ji aliyê Serokê Konfederasyona Komeleyên Kurd ê Fransa FEYKA Mahmud Çolak ve hate kirin.

Paşê nûnerên Tevgera Mafê Mirovan ên Franse û Komeleya Dostaniyê ya Franse û Kurdan bi daxuyaniyên xwe piştgiriya xwe ya ji bo Kurdan anîn ziman.

Serokê belediya Strasbourgê jî tevlî mîtîngê bû.

Tevî Kongra Gel, PJA, TECAK, Hêzên Parastina Gel, parêzerên Ocalan jî ji bo mîtîngê peyam şandin.

Di peyaman de komploya 15 Sibatê, êrîşên li Hewlêre û girtina Medya Tv hate şermezarkirin.

Di dema Sinevizyona der barê jiyana Ocalan de hat nîşan dan, Gel kêliyên hêstiyarî jiya.